«SPIRFOLET» di Raffaele Serafini

Lis regulis di Contecurte

Lis regulis di Contecurte a son pocjis. La conte e à di jessi par furlan, tignint cont di dutis lis sfumaduris de marilenghe. La conte e à di zirâ ator lis 2000 batudis, spazis comprendûts, che par un editôr al sarès pôc plui de lungjece di une cartele, par nô e je che di une storie che a si lei intun glotâr. Il gjenar al è libar, il stîl de conte ancje. L'impuartant al è che si conti une storie. Par che lis contis a sedin bielis di lei, a àn di sedi bielis di viodi, curadis e cence falopis, fasêt il pussibil. Se no sês sigûrs di ce scrivi e di cemût scrivilu, domandaitnus un consei. Tai limits des nestris pussibilitâts o sarìn pronts a judâus. Mandait la vuestre conte a contecurte[caiut]gmail.com e spietait, us visarìn cuntune mail ae vuestre direzion di pueste cuant che le publichìn.

Manifest

«Contecurte» e je une ostarie leterarie, li che si cjatisi par lei cualchi conte a fâle cognossi ai amîs. E vûl jessi un lûc viert a ducj chei che àn plasê di lei e di scrivi in marilenghe, o ancje dome di imparâ a cognossile. Ducj a podin jessi autôrs e mostrâ la lôr opare, metintle sot il judizi dai letôrs e dai altris autôrs. Corezions, sugjeriments, ideis a son i benvignûts, ma simpri fats cun gracie, par miorâ e miorâsi.

Nus plasarès

Nus plasarès che lis contis a fossin "furlanis", e no dome in furlan. Che a sedin ambientadis in Friûl e che a cjacarin di Gjovanin e Marie, pluitost che di Johnny e Mary. Nus plasarès che, ancje se curte, si conti pardabon une storie, cuntun denant e un daûr, magari peade a lis tantis liendis e ai mîts da la nestre tiere. Al sarés biel lontanâsi da lis robis di simpri e rivâ adore a contâ storiis cun mentalitât e sensibilitât modernis. Al sarès biel ancje viodi tancj coments, par che a son chei che tegnin vîf un blog, ancje dome par dî di vê let la conte. Nus plasarès podê peâ une imagjine a ogni storie; se par câs a 'nt vês une che us à ispirât, mandaitle. Nus plasarès, soredut, sburtâ ducj chei che a pensin e a cjacarin par furlan, ma a crodin di no sedi bogns di scrivilu, a cambiâ idee, judantsi cui struments che il web al met a disposizion.

Imprescj

Grant dizionari bilengâl

Coretôr ortografic

Dizionari ortografic

La tastiere par furlan

Vichipedie

Cemût scrivi une buine conte curte 1

Cemût scrivi une buine conte curte 2

IL LIBRUT DIGJITÂL DI CONTECURTE

«SPIRFOLET» di Raffaele Serafini

venerdì, 08 maggio 2009

– Su siorut, che a mi disi svelt, che o vin lavôr.
– Eh, no sai propit ce mût començâ, siôr Caporâl… – al tacà il vecjut, strissinant lis peraulis, e cu la vôs plui ruspiose di une sgrazule.
– Intant no soi Caporâl, – lu corezè il carabinîr, cun gracie – e ce disial di començâ dal imprin?
Il vecjut, dut tirât dentri tal capot, a al si sentà su la cjadree e al poià il cjapelat sui zenoi.
– Lui ajal presint che gleseute, tal mieç dai cjamps, dongje Basandiele?
– Ma… sì… plui o mancul. – i rispuindè chel altri, balonant.
– Ben po, jo passi simpri par lì, cuant che e je fumate. Sajal, cu la me cinccent al è miôr no riscjâ incidents.
– Al fâs ben, al fâs ben… ma che mi disi, par plasê, isal sucedût alc? Ajal viodût cualchi forest pôc di sest?
– Ben po siôr Brigadîr, forest, no sai, ma cun chê che mi à petade, al è di sigûr un disgraciât!
– Che a mi conti alore, su. E che al viodi, che no soi nancje Brigadîr – i disè chel altri, començânt a cjapâlu in serietât.
– Alore, – al tacà il vecjut, metintsi a scatarâ subit daûr intal fasolet e ficjanlu su pe manie – mi soi fermât denant di chest tabernacul, par dî une avemarie e o ai sintût une vôs che a mi clamave.
Il carabinîr al messedave cjartis. Il vecjut al jere simpatic, ma i pareve ancje un pôc fûr cu la cassele.
– Si che – al lè indenant chel, scjassant un dêt – o ai viodût saltâ fûr di une criture jenfri doi modons un omenut, picinin tant che une bilite, brut, plen di grumbulis su la muse, e cun dôs orelis lungjis tant che un gneur! Mandi! mi à dit dut content. E jo ce vevio di fâ, siôr Maressial, lu ai saludât!
– E dopo? – i domandà il carabinîr, aromai convint di vê a ce fâ cuntun mat.
– E dopo i ai domandât cui che al jere, no? E sajal ce che a mi à rispuindût? Un spirfolet! mi à dit! E jo i ai fat, dispo spirfolet, ma ce fâstu achi? Va vie in Cjargne a fâ di code ai cjargnei?” E lui sajal ce che a mi à dit, siôr Colonel?
– Ce al ajal dit? – i fasè il carabinîr, menant il cjâf.
– Mi à dit, intant, ti ai fate sparî la machine a ti, e pai cjargnei pensarai! E difati mi soi zirât e le mê cinccentute blancje a no si la viodeve plui!
– Ah! – al fasè chel altri, mostrant un tichinin di interés – E cemût isal vignût fin chi? – i domandà – A pît? O si isal fat compagnâ?
– Ben po no! A soi vignût cu la cinccent ve?! – i rispuindè il vecjut, maraveât.
– Ma no i a la vevie robade il spirfolet! – i fasè l’om de Benemerita, un pôc secjât.
– No robade! Fate sparî! No si la viôt plui.
– Une machine invisibile?
– Ben po, invisibile no dal dut, par ce che jo la viôt, se no ce mût fasaressio a montâ parsore?!
– Ah… che mi scusi – i disè di gnûf chel altri, scjafoiantsi par tignî dûr di ridi – E alore ce vino di fâ? Une biele denunce cuintri il spirfolet par “Cancellazione di Veicolo”?
– Benon! Cussì va ben! Al covente il non, vere?
– Eh sì, che a mi disi. Lui al è il siôr…
– Bepo!
Il carabinîr al scrivè su un A4 ‘bepo’ e po, cun creance, i disè al vecjut di lâ indilunc. Pene che al fo fûr dal Comant, il zovenot nol podè parâsi di ridi.
Al ridè un pôc mancul, però, cuant che pal barcon, al viodè il vecjut slontanâsi sentât par aiar, a mieç metri di tiere, che al pareve vuidâ une machine trasparente.
O varai viodût mâl, al pensà cun mieze ridade ancjemò tai dincj, ma ancje che mieze e murì, cuant che voltantsi, al viodè che la sô Golf, gnove di pache, e jere sparide.

di Raffaele Serafini

___________________

O sierin la setemane cuntune conte di Raffaele, che al scjampe dal so solit orôr par cirì di gjavânus une ridade, pûr restant tal ambit dal fantastic.
La conte e je nade, nus à dit, propit de fotografie che al à fat tai cjamps dongje Basandiele, intune zornade di fumate.

Scrit di contecurte a lis 00:25 | link | commenti (12)
Autôrs, lûcs, gjenars: ironic, fantastic, raffaele serafini, contis, basandiele

Commenti

#1 08 Maggio 2009 - 07:22

I sbilfs a vivin sot il baraçâr blanc.
Cualchi volte a fasin dispiets, a nascuindin lis robis, a deventin bilite e gjat...
Dome i fruts- o chei che son simpri fruts- ju viodin.
Biele conte, brâf.
giuliana

utente anonimo

#2 08 Maggio 2009 - 08:47

Al è dome un probleme: i "sbilfs" tal sens dal talian "folletti" par furlan no esistin!!
O almancul no esistevin prin dal 1995, cuant che al è vignût fûr un libri cul titul "Sbilfs - la grande famiglia dei folletti carnici": un libri che al savolte la tradizion des contis furlanis cence cognossile e che al à fat un biel dam al patrimoni culturâl furlan. Par altri a domandâ in Cjargne, i Sbilfs no si saveve nancje ce che a jerin, stant che e jere une peraule che si doprave pal plui in Furlanie tal so significât origjinâl. Di fat la peraule "sbilf" par furlan e je, ma e segne une altre sorte di figure magjiche, che no à nuie di ninin o dispietôs. Il "sbilf" al è une robe pardabon brute: un strion che al va cul spirt fûr dal cuarp, a tormentâ la int intant che e duar, a fâle inmalâ, a fâ vignî cjaristie e muart; il sbilf al è il strion nemì dal benandant.
Chel di cheste conte al podarès jessi un maçarot, o plui in gjenerâl un spirfolet...

Sandri

utente anonimo

#3 08 Maggio 2009 - 12:14

La conte e je un grum ninine e Stiefin si rangje ben cul regjistri comic.
Forsit il finâl al è un tichinin previodibil. Al sarès stât interessant sierâle dute al contrari: une daûr chê altre a sparissin lis machinis di ducj, fûr che chê dal carabinîr, cussì al impare a ridi de diviersitât di chei altris!
Ma lu dîs par divertiment, no par dotoreç.
O ripet, la conte e je gjoldibile come che e je e o savìn che dutis lis contis e ametin cetancj finâi!
Nol reste altri che complimentâsi.

Benrivadis ancje lis precisazions di Sandri sui Sbilfs.

Mandi
Gianfranco Pellegrini

utente anonimo

#4 08 Maggio 2009 - 12:19

Scusait, o volevi dî Raffaele no Stiefin!!!
Al sarà un spirfolet che al zire ator a fâmi dispiets!

Gianfranco

utente anonimo

#5 08 Maggio 2009 - 14:11

Di comun acuardi cul autôr, che a nol veve pensât plui di masse al titul, nus à confessât, o vin pensât di cambiâ il titul in "Spirfolet". :)
O ringracjin Sandri per lis precisazions ;)

Guarda il mediablog (foto, audio e video) di questo utente.

contecurte

#6 08 Maggio 2009 - 16:32

Come Spirt o pues dome che preseâ cheste conte sui miei amîs e parincj dal Paîs de Magance.
Lassant i zûcs di peraulis la conte e je scrite ben e un dai aspiets che mi plasin plui e je la caraterizazion dai personaçs.

Spirt

utente anonimo

#7 08 Maggio 2009 - 17:12

o ringraci ducj pai coments e pal preseament che jo cjati scuasit esagjerât :)
La conte in efiets a voleve jessi propit lizere lizere, e soi dacuardi che il finâl al è iper-telefonât; ma plui che altri o vevi voie, cuant che le ai scrite, di meti in pîts il vecjut mieç mat e simpatic, di front al carabinîr, ancje bon, ma che a si mostre par ce che ogni tant a son i puescj che àn podê: suficients o pôc interessâts a scoltâ.

O ringraci sandri par la corezions dai Sbilf -- spirfolets. No mi eri minimamentri informât e o vevi metût un archetip fantastic a câs, dome pal fat che al è cognossût. Spirfolet mi plâs tant di plui. :)

gelostellato

#8 09 Maggio 2009 - 06:24

Par sei ninine a è ninine e a si varès di tignîle a mens par contâle ai fruts, ansit recitâle. A mi somee buine par voltâle cun cualchi variazion come ch'a si fasarès cun tune vilote cuant ch'a no si si impense lis peraulis.
Jaio

utente anonimo

#9 11 Maggio 2009 - 08:06

Ma perchè non apprezzarlo e basta? Mi pare bello, ben scritto e non gli manca nulla. Tantomeno finali diversi, o sorprese non telefonate. Talvolta, quando uno scrittore sa giocare bene, le parole "leggere" sanno raccontare, e basta.
Frank Spada

utente anonimo

#10 11 Maggio 2009 - 08:49

Frank, ti vin scuviert :)
A savìn che tu sês di Udin e ti invidìn a scrivi alc par furlan e mandânusal :D

O cirìn clientele gnove... :)

contecurte

#11 11 Maggio 2009 - 17:51

mandà cè, se une volte o ai domandat a l'adet dal distrubutor che mi controli il voli, e lui mi ha smicjat con una pieghe di brut che mi ha fat vegnì pore.
Distintamente chiedo: Mi può controllare l'olio?
Mandi.
FRank Spada

utente anonimo

#12 11 Maggio 2009 - 20:11

Rafaêl al cjate ca la sô miôr vene fantastiche e sureâl.
Brâf, no sai cemût che tu rivis a platâle, chê vene, là le metistu?