Un aspiet une vore interessant di chestis flabis al è la struture: za plui di otante agns indaûr il grant studiôs rus Vladimir JakovleviÄ� Propp al à individuât un scheme che tantis flabis a rispietin, cundut che a puedin vê cualchi viariante.

Par esempli pal solit a son simpri chestis figuris:

-         protagonist che al partìs di une situazion pal solit dificile e che dilunc de conte al à di rivâ a un obietîf positîf;

-         antagonist, che al cîr di fâ un dam al protagonist;

-         aiutant che al jude il protagonist.

Te struture pal solit a son:

-         une situazion di partence avonde negative, o positive che e ven vuastade

-         l’antagonist al fâs un dam

-         il protagonist al fâs un viaç par miorâ la situazion o par comedâ il dam

-         tal viaç il protagonist al à di passâ provis, dispès par passâlis al dopre struments magjics

-         il protagonist al bat l’antagonist e al rive al so obietîf

In diviers câs chescj elements di base a puedin formâ seriis secondariis cu la stesse struture o mudâ in part la lôr secuence, cun di plui a puedin jessi altris elements o une ripetizion de stesse struture plui voltis, ma i tocs de costruzion a restin simpri chei.

Ce che al è interessant al è che chest scheme struturâl al funzione une vore ben simpri: al è alc che al rispuint in maniere perfete al nestri jessi, al nestri sintî e ae nestre esperience. Par chel si cjate cheste stesse struture in narazions ancje di altris sortis: mîts classics (par esempli Perseu), romançs elaborâts (par esempli, restant dongje dal gjenar de flabe, The Lord of the Rings), crodincis religjosis (par esempli li vicendis di Crist e di tancj sants) e fintremai films e telefilms.

Invezit intune conte curte di 2000 caratars in gjenar nol è avonde spazi, e si à di doprâ altris tecnichis.